Semeıde fızıka pániniń muǵalimi estrada ánshileriniń ánderine sóz jazyp berip júr

SEMEI. KAZINFORM — Semeı qalasynda ashylǵan alǵashqy № 51 «Keleshek mekteptiń» dırektory ári fızıka pániniń muǵalimi Qaıyrbek Ábilqasymov qazaqstandyq estrada ánshileri oryndaıtyn ánderdiń sózin jazyp berip júr. 

Pedagog eki jyldan beri óleń jazyp keledi. Qazir 1000-nan astam óleńi bar. Áni men sózin ózi jazǵan shyǵarmalary júzden asady.

— Negizinen óleńge degen yqylasym bala kezimnen baıqaldy. Oqýshy kúnimde qazaq aqyn-jazýshylarynyń týyndylaryn erekshe súıip oqydym. Batyrlar jyry men dastandarǵa qarshadaıymnan qanyp óstim. Mektepte júrip, ana, Otan, ustaz taqyryptaryndaǵy óleńderdi, Abaıdyń shyǵarmalaryn jatqa aıtatynmyn. Sol sátten bastap poezııa meniń jan serigime aınaldy. Biraq óleń jazý qabileti 50 jasqa tolǵanymda ǵana keldi, — deıdi Qaıyrbek Ábilqasymov.

Endi ol aldaǵy ýaqytta jeke kitabyn shyǵarýdy josparlap otyr. Týyndylary mahabbat, tabıǵat, qoǵam jáne adamnyń kúndelikti ómiri taqyryptaryna arnalady.

Sondaı-aq mektep gımnin jazǵan. Qazir ánge aranjırovka jasalyp jatyr. Jaqyn arada ony mektep oqýshylary oryndaıtyn bolady.

— Qazaqtyń birneshe ulttyq aspabynda oınaı alamyn. Atap aıtqanda, dombyra, tuıaqtas, daýylpaz. Gıtara da shertemin. Osynyń ishinde júregime eń jaqyny — dombyra. Sebebi dombyra — qazaq rýhynyń úni, sózdiń kıesi, shabyttyń shynaıy bastaýy. Ár kúı men ár ún men úshin jańa óleńniń týýyna sebep bolady, — deıdi pedagog.

Foto: Qaıyrbek Ábilqasymovtyń jeke arhıvinen

Án men muǵalimdik qyzmetti qatar alyp júrgen keıipkerimiz mektepke óziniń tárbıege qatysty avtorlyq baǵdarlamasyn, «1000 kitap» jobasyn engizip, rýhanı-mádenı bastamany qolǵa alǵan.

Onyń «Ol sezim» dep atalatyn týyndysy Nurbolat Abdýllın oryndap júr. Gúldana Noǵaıbaeva, Qarshyǵa Iltanov, Janbolat Erbatyrov syndy ánshilerge de sóz jazyp bergen.

Mektep dırektory bolý — úlken jaýapkershilik pen senim júkteıtin mańyzdy mindet. Basty maqsatym — sapaly bilim men rýhanı tárbıe beretin zamanaýı orta qalyptastyrý. Ujym músheleriniń kásibı damýyna qoldaý kórsetip, kreatıvti ıdeıalardy júzege asyrýǵa múmkindik beremin. Shyǵarmashylyq men úshin — jan tynysy, al basshylyq — el aldyndaǵy amanat. Ekeýin úılestirý úshin tártip, ýaqytty tıimdi josparlaý jáne ishki motıvatsııa qajet. Shyǵarmashylyq kúnimdi baıytady, al qyzmetim jelkenimdi túzeıdi. Biri-birine kedergi emes, qaıta birin-biri tolyqtyrady, — deıdi Qaıyrbek Ábilqasymov.

Sóz sońynda ol barsha áriptesterin kásibı merekemen quttyqtady.

— Ustaz — ulttyń qazyǵy, rýhtyń jaryǵy. Áriptesterimdi Ustazdar kúnimen shyn júrekten quttyqtaımyn! Sizderdiń eńbekterińiz — el bolashaǵyna qalanǵan máńgilik irgetas. Shákirti ozǵannyń júzi jaryq, sózi anyq. Eńbekterińiz elenip, bedelderińiz bıikteı bersin. Denderińiz saý, mereılerińiz ústem bolǵaı! , — deıdi № 51 mektep dırektory.

Eske salsaq, osyǵan deıin Almaty oblysynda mektep muǵalimi aǵylshyn tilin rep arqyly úıretetindigi habarlanǵan.