Semeıde Ertis ózeninde sý deńgeıiniń kóterilýine baılanysty 11 adam qaýipsiz jerge kóshirildi
SEMEI. KAZINFORM – Semeı qalasyndaǵy Ertis ózeninde sý deńgeıiniń kóterilýinen Beıbitshilik aralynda turatyn 11 adam qaýipsiz jerge kóshirildi.
Qazirgi ýaqytta Ertis ózeniniń sý deńgeıi – 457 sm. Beıbitshilik araly turǵyndarynyń qaýipsizdigin qamtamasyz etý maqsatynda TJD, jergilikti atqarýshy organ jáne 68303 áskerı bóliminiń qyzmetkerleri birlesip 21 qańtarǵa qaraǵan túni bóget salý, ózen arnasyna sý burý úshin jol tósemin ashý jumystaryn júrgizdi. Sondaı-aq ózen arnasyna 5850 tekshe metr sý qaıta jiberildi.
«Túnde Beıbitshilik aralynan 11 adam, onyń ishinde 3 bala evakýatsııalandy. Olar Semeı qonaq úıine ornalastyryldy. Azamattardy jergilikti atqarýshy organdar ystyq tamaqpen qamtamasyz etti. Úı janýarlary da qaýipsiz jerge jetkizilgen», - dep habarlady Abaı oblysynyń ákimdigi.
Turǵyn úılerdi sý basý qaýpi joq. Ár saǵat saıyn quzyrly organdar ýchaskelerdi aralap, sý deńgeıine monıtorıng júrgizýde. Sý deńgeıi árbir 2 saǵat saıyn ólshenýde.
Osyǵan deıin Semeıde Ertis ózeniniń sý deńgeıi kóterilip ketkenin habarladyq. Osyǵan qaraı oblys ákiminiń basshylyǵymen tótenshe jaǵdaıdyń aldyn alý jónindegi komıssııanyńotyrys ótip, qutqarýshylarǵa turǵyndarǵa kómek kórsetýge daıyn bolý kerektigi aıtyldy.
