Semeıde Ertis ózeniniń jaǵalaýyn bekitip jatyr
ShQO Tótenshe jaǵdaılar departamenti baspasóz qyzmetiniń málimetine súıensek, kóktem kezinde Beıbitshilik aralynda, Mırnyı, Shyǵys, Prıstan aýdandarynda jaǵalaý mańyndaǵy úılerdi sý basýdyń aldyn alý úshin qazirgi ýaqytta Ertis ózeniniń jaǵalaýyn bekitý jobasy júzege asyrylýda.
«Beıbitshilik aralyndaǵy 32 úıde 134 adam, Mırnyı kentindegi 30 úıde 150 adam, Shyǵys kentindegi 112 úıde 342 adam, Prıstan aýdanyndaǵy 80 úıde 400 adam sý basý qaýpi bar aımaqqa kiredi. Jalpy Semeı qalasy boıynsha 15 ýchaskeni sý basýy múmkin. Ondaǵy 631 úıde 2364 turǵyn bar», - dedi oblystyq TJD tótenshe jaǵdaılardyń aldyn alý basqarmasynyń bastyǵy Alekseı Shtykel.
Bekitetin jaǵalaýdyń jalpy uzyndyǵy 2566 metrdi quraıdy. Osy joba «Jumyspen qamtýdyń jol kartasy» baǵdarlamasy aıasynda júzege asyrylmaq. Sonymen qatar joba boıynsha uzyndyǵy 9 metr jaǵalaý boıyna beton plıtalar qoıý kózdelip otyr.
«2022 jylǵy sý tasqyny kezeńine Semeı qalasynyń TJB jeke quramy men tehnıkalary daıyn. Naqty aıtqanda, 40 adam, 8 tehnıka, 2 júzý quraly men 25 motopompa ázir tur. Jergilikti atqarýshy organnan 15 motopompa, 70 adam men 104 tehnıka, onyń ishinde 20 avtobýs saqadaı saı», - dedi Alekseı Shtykel.
