Semeıde Ertis boıyndaǵy aýyldardy sý basý qaýpi bar
SEMEI. QazAqparat - Semeıde Ertis ózenine jaqyn ornalasqan shaǵyn aýdandar men aýyldardy sý basý qaýpi bar. Osy oraıda, qalada tasqynnyń aldyn alý jumystary júrgizilýde. Bul maqsatqa bıyl 16 mln teńge bólingen, dep habarlaıdy QazAqparat tilshisi.
Semeıde sý tasqynyna qarsy sharalar qolǵa alynýda. Sebebi erigen qar sýynan turǵyndar jyl saıyn zardap shegedi. Byltyr 50-ge jýyq úıdi sý basyp, turǵyndar baspanalaryn tastap ketýge májbúr bolǵan edi. Búginde tótenshe jaǵdaıdy aldyn alý úshin arnaıy komıssııa qurylyp, qaýipti ýchaskelerdegi turǵyndarmen aqparattyq túsindirý jumystary júrgizilýde.
«Qazgıdromet» RMK-nyń málimeti boıynsha, qazir Ertis ózenindegi sý deńgeıi 224 santımetrge jetedi. Muzdyń qalyńdyǵy - 47 sm. Bul qalypty jaǵdaı. Degenmen kez kelgen ýaqytta Ertistiń sýy arnasynan asyp, mańyndaǵy úılerge qaýip tóńdirýi múmkin. Sondyqtan Tótenshe jaǵdaılar basqarmasynyń qyzmetkerleri turǵyndardy evakýatsııalaýǵa saqadaı saı daıyn otyr.
«Qaýip Ertis ózenine jaqyn ornalasqan úılerge tónip tur. Ásirese, Lodochnyı jáne Jolaman shaǵyn aýdandaryndaǵy, sondaı-aq qala mańyndaǵy Túıemoınaq araly, Voshod, Shyǵys, Mırnyı kentterindegi baspanalarǵa qaýip bar. Biz qazirden aldyn alý sharalaryn pysyqtap, qar shyǵarý jumystarymen aınalysyp jatyrmyz. Eger Ertis sýy arnasynan tasyp, turǵyndarǵa qaýip tónetin bolsa, olardy qaýipsiz aımaqqa kóshirýge daıynbyz», - dedi Semeı qalalyq TJB Azamattyq qorǵanys bóliminiń bastyǵy Qymbat Kópbaev.
