Semeıde erli-zaıyptylardyń ólimine kináli azamat sottaldy
SEMEI. QazAqparat - Semeıde erli-zaıyptylardyń ólimine sebepshi bolǵan áskerı qyzmetker sottaldy, dep habarlaıdy QazAqparat.
Semeı garnızony áskerı soty qaladaǵy áskerı bólimderdiń biriniń áskerı qyzmetkerine qatysty sot úkimin shyǵardy. Aǵymdaǵy jyldyń 26 tamyzynda áskerı qyzmetshi «Mazda» avtokóligimen «Semeı-Qaraýyl» tas jolynda joldyń jıegine túsip ketip, beton trýbasyna soǵylǵan. Apat saldarynan kóliktiń ishindegi 69 jáne 66 jastaǵy erli-zaıyptylar oqıǵa ornynda kóz jumǵan.
Sot sheshimimen kináli azamatqa 5 jyl merzimge bas bostandyǵynan aıyrý jáne 3 jylǵa kólik quralyn basqarý quqyǵynan shettetý jazasy taǵaıyndaldy.
«Sottalýshynyń jasaǵan áreketine ókinetindigin, jaýaptylyǵyn jeńildetetin mán-jaılar eskerildi. Jáne QR Qylmystyq kodeksiniń 63 babyna sáıkes taǵaıyndalǵan jaza shartty jaza túrine aýystyryldy»,-dedi Semeı garnızony áskerı sotynyń baspasóz qyzmetinen.
