Semeıde eki jylda 400 myń sharshy metrden astam turǵyn úı salyndy
ShQO ákimi Danıal Ahmetov Semeı jurtshylyǵymen kezdesip, qalanyń áleýmettik-ekonomıkalyq damýynyń keshendi josparynyń iske asyrylý barysyn sóz etti.
Keshendi jospar aıasyndaǵy jumystar 2020 jyly bastalyp, 2025 jylǵa deıin jalǵasady.
Jalpy somasy 260 mlrd teńgege 56 jobany iske asyrý josparlanǵan.
«Qaraǵaıly shaǵyn aýdanyn damytýǵa kóp kóńil bólinýde. Máselen, eki jyl ishinde munda bes jalǵa beriletin jáne 15 nesıelik úı paıdalanýǵa berildi. Bıyl shaǵyn aýdanda 1200 oryndyq zamanaýı mekteptiń qurylysy bastalady. Sonymen qatar keshendi jospar aıasynda Semeıde kommertsııalyq qurylys salýshylar 20 kópqabatty turǵyn úıdi turǵyzdy. «Birqabatty Shyǵys» óńirlik baǵdarlamasy boıynsha 78 úı salyndy. Jalpy eki jyl ishinde 400 myń sharshy metrden astam turǵyn úı paıdalanýǵa berildi. Belsendi qurylys jumystary 2 200-den astam otbasynyń turǵyn úı máselesin sheshýge múmkindik berdi», - dedi aımaq basshysy.
Byltyr Stepnoı jáne Sýyqbulaq kentteriniń turǵyndary ortalyqtandyrylǵan sýmen qamtamasyz etildi.
Ushaqtar kentinde sý qubyry jelisi salyndy.
«Qala joldarynyń jaǵdaıyn jaqsartý úshin birshama jumys atqaryldy. Eki jyl ishinde joldardy aǵymdaǵy jáne ortasha jóndeýge 7,2 mlrd teńge jumsaldy. Nátıjesinde, 90 shaqyrym joldar men kósheler qanaǵattanarlyq jaǵdaıǵa keltirildi. Ótken jyly Jangeldın kóshesi boıymen «Omby-Maıqapshaǵaı» trassasyna deıingi avtojoldy qaıta jańartý aıaqtaldy. «Semeı-Qaınar» jolynyń 108 shaqyrymy ortasha jóndeýden ótti», - dedi Danıal Ahmetov.
