Semeıde eki jańa mektep salynyp jatyr
SEMEI. QazAqparat – Shyǵys Qazaqstan oblysynyń ákimi Danıal Ahmetov Semeıge jumys saparymen bardy, dep habarlaıdy QazAqparat tilshisi.
Aımaq basshysy Stepnoı jáne Shyǵys kentterindegi mektepter qurylysynyń barysymen tanysty. Qazirgi ýaqytta Shyǵys kentinde 1200 orynǵa arnalǵan mektep salynýda. Merdiger – «Fırma Azııa» JShS. Kentte mektep jasyndaǵy 4000-ǵa jýyq bala turady.
Jańa bilim ordasynyń salynýy kenttegi eki mekteptiń júktemesin azaıtýǵa múmkindik beredi. Mundaı másele búginde 300 orynǵa arnalǵan jańa mekteptiń qurylysy júrip jatqan Stepnoı kentiniń turǵyndaryn da tolǵandyryp otyr.
«Bıyl osy eki mektepti paıdalanýǵa beremiz. Olar basqa mektepterdiń shamadan tys júktemesin azaıtady. Kelesi jyly Qaraǵaıly shaǵynaýdanynda jáne taǵy bir aýdanda 1200 oryndyq mekteptiń qurylysy bastalady. Bilim ordasyn qaıda salý kerektigin naqty anyqtaý kerek», - dedi Danıal Ahmetov.
Búginde qalada jylytý qazandyqtaryn jóndeý jumystary jalǵasýda. Jumys sapary aıasynda ákim qazandyqtardy rekonstrýktsııalaý barysymen tanysty.
«Ótken jyly jylýmen jabdyqtaý sharalary durys júrgizilmegen edi. Al búginde osy maqsattaǵy jumystar oń qarqynmen júrip jatqany baıqalady», - dedi oblys ákimi.
