Semeıde eki kúnde 21 turǵynnan rak aýrýy anyqtaldy
SEMEI. QazAqparat - Semeıdegi ıAdrolyq medıtsına jáne onkologııa ortalyǵynyń onkologtary eki kúnniń ishinde 21 adamnan obyr dertin anyqtady. Taǵy 54 adamnyń dıagnozy rastalý ústinde, dep habarlady QazAqparat tilshisi.
Semeıde 8-9 aqpan kúnderi óńirlik Onkologııalyq dıspanserde Ashyq esik kúni ótti. Búkilálemdik obyrǵa qarsy kúres kúni sheńberindegi shara bıyl «Bizdiń qolymyzdan keledi! Meniń de qolymnan keledi!» atty uranmen uıymdastyryldy. Maqsat - onkologııalyq aýrýlardyń aldyn alý jáne erte kezeńde anyqtaý. Shara aıasynda azamattar tegin medıtsınalyq tekserýden ótti. Jalpy Ashyq esik kúnine 300-ge jýyq turǵyn kelip, tekserilgen. Nátıjesinde onkolog dárigerler 21 adamnan rak aýrýyn anyqtady. Taǵy 54-inde derttiń belgileri tabylǵan. 242 turǵynan basqa aýrý túrleri anyqtalǵan.
Mamandardyń aıtýynsha, obyr 50-den asqan adamdar arasynda jıi kezdesedi. Buǵan sebep, adamdardyń dárigerge sońǵy kezeńde ǵana júginýi. Semeı aımaǵy boıynsha, jyl saıyn naýqastardyń 20 paıyzy aýrýdyń kesh satysynda dárigerlerdiń kómegine júginip jatady.
«Negizi, Ashyq esik kúniniń paıdasy kóp. Eń bastysy, obyr dertin der kezinde anyqtaýǵa múmkindik beredi. Turǵyndardyń ýaqytyly skrınıngtik baǵdarlamalardan ótýi, ashyq esik kúnderinde mamandardyń tekserýinen ótýi, ózi tirkelgen emhanada tekserilip turýy abzal. Ár adam densaýlyǵyna jaýapkershilikpen qaraýy tıis. Sol kezde qaýipti dertti erte kezeńde anyqtaýǵa múmkindik bar. Al, bul, aýrýdy aldyn alýǵa, emdeý nátıjesiniń joǵary bolýyna yqpal etedi», - dedi Semeı qalasynyń ıadrolyq medıtsına jáne onkologııa ortalyǵy dırektorynyń orynbasary Nurgúl Jumyqbaeva.
