Semeıde eki kólik betpe-bet soqtyǵysty
SEMEI. QazAqparat – Semeı qalasyndaǵy Abaı kóshesinde eki kólik betpe-bet soqtyǵysty, dep habarlaıdy QazAqparat tilshisi.
Qalalyq polıtsııa basqarmasy baspasóz qyzmetiniń málimetine súıensek, jol-kólik oqıǵasy 14 mamyrda saǵat 16:35 shamasynda bolǵan. Abaı kóshesimen kele jatqan «VAZ-2110» kóliginiń 28 jastaǵy júrgizýshisi aldyndaǵy avtokólikke soǵylmas úshin qarsy jolaqqa shyǵyp ketip, «Lada hray» kóligimen betpe-bet soqtyǵysty.
«Jol apatynyń saldarynan «Lada hray» kóliginiń júrgizýshisine dárigerlerdiń kómegi qajet boldy. Er adamǵa ambýlatorııalyq em taǵaıyndalǵan. Al «VAZ-2110» avtokóligin tizgindegen qala turǵyny mıdyń shaıqalýy dıagnozymen jansaqtaý bólimine jatqyzyldy», - dep habarlady vedomstvo ókilderi.
Esterińizge sala ketsek, osyǵan deıin Óskemen qalasynda urlanǵan kóliktiń apatqa ushyraǵanyn habarlaǵan bolatynbyz.
