Semeıde eki adamdy qaǵyp, birin mert qylǵan júrgizýshi izdestirilýde
SEMEI. QazAqparat – Semeıde kólik júrgizýshisi eki adamdy qaǵyp ketip, oqıǵa ornynan izin sýytty. Qalada «Ustaý» operatsııasy jarııalandy, dep habarlaıdy QazAqparat tilshisi.
Shyǵys Qazaqstan oblystyq Polıtsııa departamentinen málim etkendeı, 27 tamyz kúni shamamen keshki saǵat 8-de Semeıdiń «Bobrovka» saıajaı alabyna alyp baratyn trassada belgisiz kólik eki jaıaý júrginshini qaǵyp ketti. Olardyń biri oqıǵa ornynda kóz jumdy.
«Anyqtalǵandaı, belgisiz kólik jol boıymen kele jatqan eki aǵaıyndyny qaqqan. 16 jastaǵy jasóspirim qaza boldy, 20 jastaǵy jigit túrli jaraqattar aldy», - dedi ShQO PD baspasóz hatshysy Áıgerim Nurǵazına.
Qazir qalanyń polıtsııa basqarmasy «Ustaý» josparyn iske asyrýda. Zardap shekkenderdiń biriniń aıtýynsha, olardy qaqqan kóliktiń markasy - «Toyota Land Cruiser Prado», túsi – qaraqońyr.
«ShQO Polıtsııa departamenti adamdy qaǵyp óltirgen júrgizýshini ustaý boıynsha polıtsııa qyzmetkerleri júrgizip jatqan jumystarǵa túsinistikpen qaraýǵa shaqyrady. Eger qandaı da bir aqparatqa ıe bolsańyz nemese oqıǵa kýágeri bolsańyz «102» nómirine habarlasyńyz», - dedi baspasóz hatshy.
