Semeıde egis naýqany bastaldy
SEMEI. QazAqparat – Semeı óńirinde egis naýqany bastaldy, dep habarlaıdy QazAqparat tilshisi., dep habarlaıdy QazAqparat tilshisi.
Qalalyq aýyl sharýashylyǵy bólimi basshysynyń orynbasary Erjan Súleımenniń aıtýynsha, bıyl egis alqaptarynyń jalpy kólemi 14,7 myń gektardy quraǵan. Bul ótken jylmen salystyrǵanda 4,5% artyq. Jospar boıynsha 1049 gektar dándi daqyldar, 3096,5 gektar kartop, 1474,7 gektar kókónis, 46 gektar baqsha daqyldary egilmek. Aýyl sharýashylyq sýbektileri sapaly tuqymdarmen tolyqtaı qamtamasyz etilgen.
«Tuqymdy materıaldar sapasy men sebýge jaramdylyǵyn anyqtaý úshin «Kazagreks» AQ zerthanasyna jiberildi. Osy jyly 1-2 sorttaǵy jáne ІІІ reprodýktsııaly tuqymdar qoldanylady. Aýyl sharýashylyǵy salasyndaǵy kásipkerlerdiń 8,8 myń tonna kartop tuqymy 3096,5 gektar alqapty tolyqtaı qamtamasyz etedi. Al kókónis daqyldarynyń elıtalyq tuqymdary qaptalǵan túrde Gollandııa men Reseıden jetkizilmek», - dedi Erjan Súleımen onlaın brıfıng barysynda.
Búginde Semeıde tuqym sharýashylyǵyn damytý maqsatynda birqatar sharalar qolǵa alynýda. Shaharda kartoptyń joǵarǵy ónimdi tuqymdaryn óndiretin 2 aýylsharýashylyq qurylymy bar. «Agrofırma Prırechnoe» JShS men «Muzdybaı-1» ShQ bıyl kartoptyń 1200 tonna І, ІІ, ІІІ reprodýktsııaly tuqymdaryn satýǵa daıyndady.
