Semeıde egis alqaptary keńeıe túsedi
SEMEI. QazAqparat – Semeıde egin egý naýqany 20 sáýirde bastalady, dep habarlaıdy QazAqparat.
2020 jyly Semeıdegi egistik alqaby 14700 gektardy quraıdy. Bul ótken jylmen salystyrǵanda 4,5% artyq. Jospar boıynsha 1049 gektar dándi daqyldar, 3096,5 gektar kartop, 1474,7 gektar kókónis, 46 gektar baqsha daqyldary, 8049,8 gektar azyqtyq daqyldar jáne 984 gektar maıly daqyldar egiledi.
«Osy jyly sharýagerler sapaly tuqymmen tolyqtaı qamtamasyz etiledi. Tuqymdy materıaldar sapasy men sebýge jaramdylyǵyn anyqtaý úshin «Kazagreks» AQ zerthanasyna jiberildi. Aýyl sharýashylyǵy salasyndaǵy kásipkerlerdiń 8,8 myń tonna kartop tuqymy 3096,5 gektar alqapty tolyqtaı qamtamasyz etedi. Al kókónis daqyldarynyń elıtalyq tuqymdary qaptalǵan túrde Gollandııa men Reseıden jetkizilmek», - dep habarlady qalalyq aýyl sharýashylyǵy bólimi.
Búginde Semeıde tuqym sharýashylyǵyn damytý maqsatynda birqatar sharalar qolǵa alynýda. Shaharda kartoptyń joǵarǵy ónimdi tuqymdaryn óndiretin 2 aýylsharýashylyq qurylymy bar. «Agrofırma Prırechnoe» JShS men «Muzdybaı-1» ShQ bıyl kartoptyń 1200 tonna І, ІІ, ІІІ reprodýktsııaly tuqymdaryn satýǵa daıyndady.
Aıta keteıik, osy jyly qala boıynsha egin egý naýqany 20 sáýirde bastalyp, 15 maýsymda aıaqtalmaq.
