Semeıde dombyrashy robot «Jyl tańdaýy» atandy

SEMEI. QazAqparat – Semeıde dombyrashy robottyń avtorlary «Jyl tańdaýy – 2019» baıqaýynda «Jas ǵalym» nomınatsııasyn jeńip aldy, dep habarlaıdy QazAqparat tilshisi Nazarbaev Zııatkerlik mektebiniń baspasóz qyzmetine silteme jasap.

Marapattaý rásimi «Jyl tańdaýy – 2019» jastar forýmy aıasynda ótti. Fızıka-matematıka baǵytyndaǵy Nazarbaev Zııatkerlik mektebiniń 10-synyp oqýshysy Nurbol Maqtaev pen Mıras Muratqanov Semeı ákimi Ermaq Sálimovtiń qolynan «Memlekettik jastar saıasatyn iske asyrýǵa qosqan úlesi úshin» syılyǵyn aldy.

«Ustazymyz Baqytbek Orynbaevtyń basshylyǵymen jasalǵan jobamyzdyń jeńis ákelgeni úshin qýanyshtymyz. Biz búgin jumysymyz eleýsiz qalmaıtynyn sezdik. Osy sharanyń uıymdastyrýshylaryna jáne osy forýmǵa qatysýǵa keńes bergen jobanyń jetekshisine alǵys aıtamyz», - dedi mektep oqýshylary.

Qala ákimi balalardy jeńisimen quttyqtap, tabys tiledi.

Eske salaıyq, Mıras pen Nurbolǵa dombyranyń qulaǵynda erkin oınaıtyn robotty qurastyrý úshin bir aı ýaqyt berilgen.