Semeıde «dertten aıyqtyratyn» emshi ustaldy
SEMEI. QazAqparat - Semeıde halyq emshisi alaıaqtyq jasady degen kúdikpen ustaldy. Bul týraly QazAqparat tilshisi oblystyq ishki ister departamentiniń baspasóz qyzmetine silteme jasap habarlaıdy.
Halyq emshisiniń ústinen eki qala turǵyny aryz bergen. Olardyń aıtýlarynsha, ózin emshimin degen turǵyndardyń aqshasyn jymqyryp júrgen alaıaq azamat. Ol kelýshilerdi dástúrli emes jolmen emdegen. Jol ashyp, aýrýdan aryltamyn dep ýáde etken. Osylaısha óz klıentteriniń senimine kirgen «emshi» bul qyzmeti úshin qomaqty qarjy talap etken. Al emshiniń arbaýyna túsken turǵyndar suraǵanyn oılanbastan ustatyp otyrǵan.
«2 shilde kúni keshke Áýezov polıtsııa bólimshesine 52 jastaǵy áıel 56 jastaǵy emshi er adamdy jaýapqa tartý týraly aryzben keldi. Onyń aıtýynsha azamat óziń halyq emshisi retinde tanystyryp, turǵyndardy aldap júr. Emshi óziń bir aıdyń ishinde túrli syrqatynan saýyqtyrýǵa ýáde berip, 60 myń teńge alady. Jáne 43 jastaǵy taǵy bir áıelden emdeımin dep 32 myń teńge alǵan. Alaıda onyń áreketteri kúdik týǵyzýda»,- delingen ishki ister departamenti bergen aqparatta.
Jedel aldyn alý sharalary kezinde «alaıaq» emshi qolǵa tústi. Qazir ústinen «Alaıaqtyq» baby boıynsha sotqa deıingi tergeý jumystary júrip jatyr.
