Semeıde de qatty jelden bas shyrsha qulap qaldy

Semeıde qatty jel ortalyq alańdaǵy bas shyrshany qulatty, dep habarlaıdy Kazinform.

Áleýmettik jelilerde jeldiń qatty ekpininen aımaqtyń bas shyrshasy qalaı qulaǵany týraly vıdeo tarady. 

Qalalyq ákimdik bul faktini rastap, merdiger uıymnyń oqıǵa ornyna attanǵanyn habarlady.

«Qazirgi ýaqytta jasyl konstrýktsııany bólshekteý jumysy júrip jatyr. Oqys jaǵdaı kezinde eshkim zardap shekken joq» dep naqtylady ákimdik.

Aıta keteıik, shyrshany saltanatty jaǵý rásimi ótken jyldyń 20 jeltoqsanynda ótken edi.

Bıiktigi — 19 metr, ony bezendirýge 2000 metr jaryqdıodty gırlıanda  men 100-den astam oıynshyq qoldanylǵan.

Shyrshanyń janynda Aıaz ata men Aqshaqardyń músini ornatylǵan. 

Dál qazir Abaı oblysynda aqtútek boran basylmaı tur. 

Oblystyq jolaýshylar kóligi jáne avtomobıl joldary basqarmasy 10 qańtar saǵat 22:30–dan bastap birneshe jol jabylǵanyn habarlady. 

• Dmıtrıevka-Borodýlıha — oblys shekarasy, 0-72 km;
• Borodýlıha-Jezkent, 0-49 km;
• «A-11 Semeı-RF shekarasy» — Novopokrovka-Petropavlovka-RF shekarasy, 0-42 km;
• «A-11 Semeı-RF shekarasy» — Voskresenovka — Petropavlovka-Dmıtrıevka, 0-64 km;
• Shúlbi — Jańa Shúlbi, 0-44 km.