Semeıde dárigerler jańa týǵan nárestege ota jasap, ómirin saqtap qaldy
SEMEI. QazAqparat – Semeı qalasynda dúnıege kelgen shaqalaqtan julyn aqaýy anyqtalǵan. Aq halatty abzal jandar ony qutqarý úshin jedel túrde ota jasady. 45 mınýtqa sozylǵan ota sátti ótip, qazir náreste ózdiginen demalyp jatyr.
Bul jaıly QazAqparat tilshisine Semeı memlekettik medıtsına ýnıversıtetiniń balalar hırýrgııasy jáne ortopedııa bóliminiń dárigeri Jasulan Ásetov aıtyp berdi.
«2017 jyldan beri qaladaǵy Perınataldy ortalyqtyń neonatologııa bóliminde densaýlyǵynda aqaýy bar jańa týǵan nárestelerge ota jasap kelemiz. Sebebi balany perzenthanadan aýrýhanaǵa jetkizgenshe onyń jaǵdaıy tómendep ketedi. Sondyqtan osyndaı sheshim qabyldaǵan edik. Birneshe jyldyń ishinde 6 ota jasadyq. Onyń beseýi sátti aıaqtalsa, bireýinde náreste shetinep ketti», - deıdi balalar neırohırýrgi.
3 mamyr kúni túngi saǵat 03.00-de jaryq dúnıe esigin ashqan ul balanyń salmaǵy – 3600 kelini quraǵan. Shaqalaqtan – rahıshızıs, ıaǵnı týa bitken julyn aqaýy anyqtalypty.
«Bizge habar túsken soń birden kerek-jaraqtarymyzdy alyp jolǵa shyqtyq. Eger jyldam ota jasamasa julynǵa ınfektsııa túser edi. Qudaıǵa shúkir, 45 mınýtqa sozylǵan ota sátti ótti. Dıametri 6 sm teri aqaýyn kesip alyp tastap, plastıka jasadyq. Keshe narkozda bolǵan náreste búgin kózin ashyp, ózdiginen demalýda», - deıdi Jasulan Ásetov.
Onyń aıtýynsha, qazirgi ýaqytta shaqalaqta emý refleksteri paıda bolǵan. Endi kún saıyn medıtsına qyzmetkerleri onyń densaýlyǵyn tekserip otyrady.
«Nárestede jambas qýysy aǵzalarynyń qyzmeti saqtalǵan. Biraq bolashaqta qandaı da bir aqaý týyndaýy múmkin. Óıtkeni rahıshızıs negizinen taǵy bir aqaýmen qosarlanyp keledi. Qazir dóp basyp aıtý qıyn. Bári bolashaqtyń enshisinde. Bala óse kele anyqtalýy yqtımal. Sondyqtan tekserýdi úzbeý kerek», - deıdi dáriger.
