Semeıde byltyr ǵana jóndelgen sýburqaqqa qatysty shý shyqty
SEMEI. QazAqparat - Semeıde 20 jyldan keıin jóndelip, 2017 jyldyń qazan aıynda paıdalanýǵa berilgen Ertis jaǵalaýyndaǵy sýburqaqqa qatysty taǵy shý shyqty. Qazir nysannyń jumysy ýaqytsha toqtatyldy, dep habarlaıdy QazAqparat.
Birneshe kún buryn áleýmettik jelilerde sýburqaqtyń sýy syrtyna jaıylyp jatqany týraly beınejazbalar taraǵan edi. Osydan keıin qala ákimi Ermak Sálimov nysannyń kemshilikterin tekserý úshin komıssııa qurdy. Quramynda qalalyq máslıhattyń depýtattary, qoǵam ókilderi, turǵyn-úı kommýnaldyq sharýashylyq bólimi mamandary engen komıssııa músheleri sýburqaqtan taǵy birneshe kemshilikterdi anyqtady.
Bas merdiger mekeme nysandy salý kezinde ınjenerlik-tehnıkalyq talaptardy eskermegen. Sýburqaqtyń sý qoımasy durys salynbaǵan. Saldarynan sý syrtqa aǵyp ketedi. Al syrtynan qaptalǵan granıt plıtalary durys japsyrylmaǵan. Qazir komıssııa kemshilikterdi anyqtaý jumystaryn jalǵastyrýda.
«Búgingi kúni nysanda jóndeýdi qajet etetin jumystar bar. Mamyr aıynda taǵy birqatar kemshilikter anyqtalyp, qalypqa kelgen bolatyn. Endi qurylys jáne árleý jumystarynan taǵy olqylyqtar anyqtalyp otyr. Birneshe kúnniń ishinde tekserý komıssııasy sýburqaqtyń jaı-kúıin jáne barlyq qujattardy tekseredi. Kemshilikter tolyq anyqtalǵannan keıin merdigerge beriledi. Eger jaýapty mekeme jaqyn arada qatelikterin túzetpese, olardy sotqa berýge májbúr bolamyz», - dedi Semeı qalasynyń turǵyn úı-kommýnaldyq sharýashylyq jáne turǵyn úı ınspektsııasy basqarmasynyń bastyǵy Amantaı Ótelbaev.
Aıta keteıik, mamyr aıynda sýburqaqtyń plıtalary qulap, baspaldaqtar búlingen. Ol kezde jaýapty merdiger mekemeke óz esebinen qalpyna keltirgen edi.
Alaıda araǵa aı salyp sýburqaq taǵy isten shyqty.
