Semeıde buzaqylardan zardap shekken bala endi bokspen aınalysady

ASTANA. KAZINFORM – Semeı qalasynda buzaqylardyń áreketinen zardap shekken 11 jastaǵy balaǵa QR Іshki ister mınıstrliginiń «Dınamo» dene shynyqtyrý-sport qoǵamy qoldaý kórsetti, – dep jazdy Polisia.kz.

Semeı qalasynda bolǵan buzaqylyq oqıǵasy qazaqstandyqtardy beıjaı qaldyrmady. Qoǵamnyń jappaı qoldaýynyń arqasynda mektep oqýshysy men onyń otbasy jalǵyz emes ekenin sezindi. Bul iske polıtsııa vedomstvosynyń basshylyǵy erekshe mán berip, tergeýdi jeke baqylaýyna aldy.

Jasóspirimniń bolashaǵyna alańdaýshylyq bildirgen QR Іshki ister mınıstrliginiń «Dınamo» dene shynyqtyrý-sport qoǵamy ony óz qamqorlyǵyna alyp, sport arqyly jigerlendirmek. Dınamolyqtar balaǵa tálimgerlik kórsetip, senimdiligin nyǵaıtýǵa, ózin qorǵaı bilýge úıretýdi maqsat tutyp otyr.

Abaı oblysy Polıtsııa departamentiniń bastyǵy Bektore Sultan Semeıdegi «Dınamo» sport kesheninde jasóspirimdi qarsy alyp, oǵan jas sportshylarmen birge zaldy aralatyp, jattyǵý protsesimen tanystyrdy.

– Biz balaqaı ózin eshqashan jalǵyz sezinbeýi úshin bar kúshimizdi salamyz. Sport – tek deneni shynyqtyrý ǵana emes, ol minezdi qalyptastyryp, qıyndyqtardy jeńýge úıretedi. Eń bastysy – sporttyq orta naǵyz otbasy sııaqty, senimdi tirek bola alady, – dep atap ótti departament basshysy.

Bala ásirese boksshylardyń jattyǵýyn qyzyǵýshylyqpen tamashalady. Bul sport túri oǵan burynnan unaıtynyn aıtqan jasóspirim endi «Dınamo» mamandandyrylǵan jattyqtyrýshylarynyń jetekshiligimen tegin jattyǵý múmkindigine ıe boldy. Sol kúni-aq ol alǵashqy soqqysyn boks grýshaǵa baǵyttap, óz kúshin synap kórdi. Jattyǵý sońynda oǵan «Dınamo» sporttyq formasy tabys etildi.

– Endi ol turaqty túrde jattyǵyp, kúsh-qýatyn arttyryp, óz-ózine degen senimdiligin nyǵaıtatyn bolady. Eger jaqsy nátıje kórsetse, kelesi qadamy «JAS SAQShY» polıtseılik synyptarynyń qataryna qosylý bolmaq. Munda ol quqyqtyq tártip pen tártiptilik týraly qundy bilim alady, – dep málimdedi polıtsııa departamentiniń ókilderi.

Bul bastama – balanyń ómirine tyń serpin berip qana qoımaı, onyń bolashaǵyna degen senimin kúsheıtetin mańyzdy qadam.

Aıta keteıik, Semeıde jasóspirimder altynshy synyp oqýshysyn soqqyǵa jyqty.

Semeıde 6-synyp oqýshysyn soqqyǵa jyqqan 3 jetkinshektiń áke-sheshesi ata-analyq quqyǵynan aıyryldy.

Semeıde soqqyǵa jyǵylǵan balanyń qazirgi jaǵdaıy belgili boldy.

Bilikti mamandar jasóspirimniń psıhologııalyq jaǵdaıyn qalpyna keltirý úshin jumys júrgizip jatyr.

Semeıde 6-synyp oqýshysy soqqyǵa jyǵylǵan mektep dırektory jumystan shyǵaryldy.

Semeıde soqqyǵa jyǵylǵan oqýshynyń otbasyna baspana alyp beredi.