Semeıde býkmekerlik keńse atyn jamylǵan qumar oıyny bıznesiniń jumysy toqtatyldy
««Sport Bar» ataýymen «býkmekerlik keńse» atyn jamylǵan zańsyz oıyn bıznesi qyzmetin QMA Abaı oblysy boıynsha Departamenti oblystyq prokýratýranyń úılestirýimen toqtatty.
«STOP Oıyn» sharasy aıasynda oblystyq polıtsııa departamentiniń «Arlan» arnaıy jasaǵymen birlesip, Semeı qalasynda eki mekenjaı boıynsha banknottardy qabyldaıtyn jáne qolma-qol aqshalaı utys beretin termınaldar, kompıýterler, aqsha jáne t.b. zattaı aıǵaqtar tárkilenip alyndy.
Bir top tulǵalardyń aldyn ala kelisimimen zańsyz oıyn bıznesin uıymdastyrý faktisi boıynsha sotqa deıingi tergeý amaldary júrgizilýde.
QR QPK 201 babyna sáıkes ózge de málimetter jarııa etilýge jatpaıdy» delingen habarlamada.
Aıta ketý kerek, QR «Oıyn bıznesi» týraly Zańyna sáıkes bás tigýdi nemese júlde berýdi qolma-qol aqshamen iske asyratyn býkmekerlik keńseler men lotereıalardyń kassalary tek qana Almaty oblysynyń Qapshaǵaı sý qoımasy jaǵalaýynda jáne Aqmola oblysynyń Býrabaı kýrorttyq aımaǵynda ornalastyrylýy tıis.
