Semeıde bozbala mototsıkl tizgindep, ózin toqtatqan polıtseılerden qashty
SEMEI. KAZINFORM – Semeı qalasynda 15 jastaǵy bozbala mototsıkl tizgindep, ózin toqtatqan polıtseılerden qashty
Abaı oblysy Polıtsııa departamenti baspasóz qyzmetiniń málimetinshe, kámelettik jasqa tolmaǵan mototsıklshini polıtseıler baıqap qalyp birden toqtatqan.
«Oqıǵa keshe túnde qala irgesindegi kóshelerdiń birinde boldy. Joǵary jyldamdyqpen júrgen mototsıklshi patrýldik polıtsııa qyzmetkerleriniń nazaryna ilikken. Sondaı-aq kólik quralynda nómirlik belgiler bolǵan joq. Tártip saqshylary bozbaladan toqtaýdy talap etti. Alaıda ol buǵan baǵynbaı, jyldamdyqty arttyra tústi», - delingen habarlamada.
Qabyldanǵan sharalardyń nátıjesinde mototsıklshi toqtatylyp, zańdy ókilderine berildi.
«Kámeletke tolmaǵan balanyń ata-anasy saǵat 23:00-den keıin onyń úıden tys jerde bolǵany úshin jaýapqa tartyldy. Sonymen qatar mototsıkl aıyppul turaǵyna qamaldy. Jasóspirimniń tártibi Semeı qalasy ákimdiginiń janyndaǵy kámeletke tolmaǵandardyń quqyqtaryn qorǵaý jónindegi komıssııada qaralatyn bolady», - delingen aqparatta.
