Semeıde bolǵan órtten eki adam kóz jumdy
SEMEI. QazAqparat – Semeı qalasynda jer úıden órt shyǵyp, 2 adam kóz jumdy, dep habarlaıdy QazAqparat tilshisi.
Shyǵys Qazaqstan oblystyq Tótenshe jaǵdaılar departamenti baspasóz qyzmetiniń málimetinshe, Shákárim kóshesindegi jeke turǵyn úıdiń órtenip jatqanyn kórgen kórshileri birden órt sóndirýshilerge habarlasqan. Al sol kezde úıdegi otbasy músheleri qannen-qapersiz uıyqtap jatqan. Bir ýaqytta úı ıesiniń 1997 jylǵy uly oıanyp ketip, jubaıy men balalaryn ózge bólmege aparady. Al ákesin oıatýǵa júgire jónelgen ol esinen tanyp qalǵan.
«Áıel adam balalarymen birge tereze arqyly syrtqa shyqpaq bolǵan. Alaıda onysynan túk shyqpady. Oqıǵa ornyna kelip jetken órt sóndirýshiler men polıtsııa qyzmetkerleri tereze aldynda turǵan eki balasy bar áıeldi kórgen. Olar terezeni shaǵyp, úsheýin dalaǵa shyǵardy. Ókinishke qaraı, otbasynyń otaǵasy men onyń ákesin qutqarý múmkin bolmady», - dep habarlady vedomstvo ókilderi.
Tótenshe jaǵdaılar departamentiniń dereginshe, jalyn sharpyǵan aýmaq 45 sharshy metrdi quraǵan. Tilsiz jaýdyń shyǵý sebebi – ot jaǵý kezindegi salaqtyq nemese órt qaýipsizdigi erejelerin saqtamaýdan bolýy múmkin. Jalyndy sóndirýge jeke quramnan 12 adam men 3 tehnıka jumyldyryldy.
