Semeıde bıyl jol jóndeýge 450 mln teńge bólingen
SEMEI. QazAqparat – Semeı qalasynda 2021 jyly jol jóndeýge 450 mln teńge bólingen, dep habarlaıdy QazAqparat tilshisi.
Ótken jyly shahar boıynsha 50 shaqyrym jolǵa ortasha jóndeý jumystary júrgizilgen. Bıyl osy maqsatta 450 mln teńge bólindi. Atalǵan qarajatqa 8 kósheniń jeti shaqyrymnan astam joly jóndelmek. Onyń ishinde Altaı kóshesi men Morozov kóshesinen Shákárim dańǵylyna deıingi aralyq qamtylǵan. Ótkizilgen baıqaýdyń qorytyndysy boıynsha merdiger uıym bolyp «Gordorstroı»JShS bekitildi.
Jol jóndeý jumystary osy jyly 9 sáýirde bastaldy. Búgingi tańda jol jabynynyń sapasy nashar kóshelerdi frezerleý júrgizilýde. Olardyń arasynda Chehov, Şors jáne Aımaýytov kósheleri bar. Mundaǵy merdiger uıym - «Tazalyq» JShS.
«Birinshi kezekte kólik jıi júretin kósheler jóndeledi. Sodan keıin ekinshi kezektegi kóshelerge bet buramyz. Aǵymdaǵy jóndeýge eki brıgada jumyldyrylǵan. Jóndeý jumystaryn tıisti merzimde aıaqtaımyz», - deıdi qalalyq Jolaýshylar kóligi jáne avtomobıl joldary bólimi bastyǵynyń orynbasary Nurlan Serǵazınov.
Onyń aıtýynsha, oryndalǵan jumystardyń sapasyn tekseretin arnaıy zerthana mamandary muqııat baqylaý júrgizýde.
«Jumys aıaqtalǵannan keıin synamalar alynyp, taldaý júrgizý úshin zerthanaǵa jiberiledi. Eger jol sapasyna qatysty qandaı da bir másele týyndaıtyn bolsa, bul kemshilikter merdigerdiń óz esebinen joıylady. Sodan keıin zerthanalyq taldaý qaıtadan júrgiziledi», - dedi Nurlan Serǵazınov.
