Semeıde bıyl kópqabatty 3 úı men balabaqsha qoldanysqa beriledi
ASTANA. QazAqparat - Semeıde aldaǵy ýaqytta 90 kópqabatty úı men ondaǵan áleýmettik nysandar boı kótermek, dep habarlaıdy altaynews.kz.
Semeı qalasynda «Qaraǵaıly» jańa yqsham aýdanynda osy jyldyń aıaǵyna deıin 3 turǵyn úıdiń qurylysy aıaqtalyp, úleskerler baspanalaryna qol jetkizedi. Bunymen qosa bıyldan qalmaı 320 oryndyq jańa balabaqsha paıdalanýǵa beriledi. Bul baǵytqa shamamen 900 mıllıon teńgedeı qarajat jumsalyp otyr.
Osy rette, páterdi satyp alamyn dep nıet bildirip otyrǵan turǵyn úı qurylys jınaq bankiniń salymshylary aýdannyń qazirgi ahýalyn óz kózderimen kórip qaıtty.
«Qaraǵaılydan úı alamyz dep josparlaǵanymyzǵa eki jyldaı boldy. Bank qoryna 1,5 mln teńge aqsha salyp qoıdyq. Mine, endi úılerdi qarap shyqtyq. Barlyǵy óte qatty unady», -dedi Ádemi Demejanova.
Aıta keteıik, kún ótken saıyn qulashyn keńge jaıyp kele jatqan aýmaqta aldaǵy ýaqytta 90 kópqabatty úı men ondaǵan áleýmettik nysandar boı kótermek.
