Semeıde bıyl 60,6 shaqyrym jol jóndeledi
SEMEI. QazAqparat – Semeı qalasynda osy jyly 60,6 shaqyrym jol ortasha jóndeýden ótedi, dep habarlaıdy QazAqparat tilshisi.
Qala ákimdiginiń málimetine súıensek, sońǵy 3 jylda kólik-logıstıkalyq ınfraqurylymdy jaqsartýǵa 11 mlrd teńgeden astam qarajat jumyldyrylǵan.
«Bıyl 60,6 shaqyrym jol ortasha jóndeýden ótedi. Kólik keptelisin azaıtý maqsatynda Shyǵys kentindegi Óskemen kóshesin keńeıtý jumystary bastalady. Sondaı-aq jańa meshittiń ońtústik jaǵyna 133,2 mln teńgege ekinshi jerústi jaıaý júrginshiler ótkelin salý kózdelip otyr», - deıdi shahar basshysy Baqytjan Baıahmetov.
Onyń aıtýynsha, qaladaǵy kólik kópirin rekonstrýktsııalaýǵa 31,3 mlrd teńge qajet. Joba salalyq mınıstrlikke respýblıkalyq bıýdjetten qarajat bólý úshin jiberilgen.
Joldaǵy qaýipsizdik deńgeıin arttyrý úshin «Sergek» fotobeınetirkeý júıesin iske qosý jumystary júrgizilip jatyr.
