Semeıde bıyl 15 kópqabatty úı boı kóteredi

SEMEI. QazAqparat – Semeı qalasynda jyl sońyna deıin 15 kópqabatty úı salynady, dep habarlaıdy QazAqparat tilshisi.

Qala ákimdiginiń málimetine súıensek, Semeıde úı kezeginde 13 000-nan astam adam tur. Osyǵan oraı, Qaraǵaıly yqsham aýdanynda 26 bıýdjettik kópqabatty turǵyn úıdiń qurylysy júrgizilýde.

«2023 jyldyń sońyna deıin memlekettik baǵdarlama boıynsha salynyp jatqan 15 kópqabatty turǵyn úıdiń qurylysyn aıaqtaý josparlanýda. Onda barlyǵy 487 páter bar. Qazirgi tańda bıýdjettik turǵyn úılerdiń qurylysy qarqyndy. Ásirese, sońǵy jyldary Qaraǵaıly shaǵyn aýdanynyń damý perspektıvasy joǵary», - delingen aqparatta.

Qala ákimi Nurbol Nursaǵatov Qaraǵaılydaǵy qurylys jumystaryna paıdalanylatyn qurylys materıaldarynyń sapasyna jáne obektilerdi salý merzimderiniń saqtalýyna erekshe nazar aýdarýda.

Qurylys bólimi basshysynyń orynbasary Nurbek Jasybaevtyń málimetinshe, merdiger uıym bekitilgen normadaǵy jumystardy sapasyz istese, arnaıy shara qoldanylyp, keltirilgen shyǵyndy ótep, qalpyna keltirýge mindetteledi.

Eske salsaq, osyǵan deıin Semeıde jańa et kombınaty salynýy múmkindigin habarlaǵan edik.