Semeıde birqatar kásipkerlik nysandar qaıta jumys isteı bastaıdy
SEMEI. QazAqparat – Shyǵys Qazaqstan oblysynyń ákimi Danıal Ahmetov jumys saparymen Semeı qalasyna baryp jergilikti kásipkerlermen kezdesti.
Aımaq basshysy bıznes ókilderine búgin jarııalanǵan bas sanıtarlyq dárigerdiń jańa qaýlysynda qarastyrylǵan karantın tártibiniń kezeń-kezeńmen jeńildetilýi týraly aıtty, dep habarlaıdy QazAqparat tilshisi.
ShQO ákimi baspasóz qyzmetiniń málimetinshe, erteńnen bastap Semeıde 30 oryndyq qoǵamdyq tamaqtaný nysandary, sondaı-aq jazǵy alańdar jumys isteı bastaıdy. «Kezekshi top» rejıminde balabaqshalar men jeke jáne toptyq daıyndyqtarǵa arnalǵan mádenıet nysandary, avtokólikterdi, turmystyq tehnıkany satý salondary, qurylys materıaldaryn kóterme-bólshek satý saýda oryndary, sulýlyq salondary, kir jýatyn oryndar jumysqa qaıta kirisetin bolady.
Oblys basshysy atap ótkendeı, Semeı qalasy boıynsha aldaǵy sheshim epıdemıologııalyq jaǵdaıǵa baılanysty qabyldanatyn bolady.
«Eger kelesi aptalarda bizde jaǵdaı turaqtansa, onda qosymsha sheshim qabyldaımyz. Biraq qazir qala turǵyndarynyń ómirine qaýip tóndirýge bolmaıdy. Jaǵdaı turaqtalsa, karantındik sharalar jeńildetiledi. Eger nasharlasa, onda adamdardyń densaýlyǵyn qorǵaý úshin tıisti sharalar qabyldaıtyn bolamyz, – dedi ShQO ákimi.
Esterińizge sala keteıik, sońǵy 3 kúnde Semeı qalasynda koronavırýs ınfektsııasyn juqtyrýdyń 23 jańa jaǵdaıy tirkelgen. Danıal Ahmetov qajetti sanıtarlyq sharalardy saqtaýdyń mańyzdylyǵyn atap ótti. Óz kezeginde kásipkerler qabyldanǵan sheshimdi qoldap, sanıtarlyq normalardy ózderi ǵana emes, sonymen qatar olardyń kelýshileri de saqtaıtyn bolady dep sendirdi.
«Biz úshin kásiptiń alǵa basýy óte mańyzdy. Jumysymyz 16 naýryzda toqtady. Búgingi jıyn barysynda bizge keıbir nysandardyń qyzmeti qaıta bastalatyndyǵy týraly aıtyp berdi. Sondaı-aq biz ákimniń usynysy boıynsha arnaıy kásipkerler tobyn quryp, qala basshysymen jumys isteıtin bolamyz. Endi ár sársenbi saıyn jınalyp, óz usynystarymyzdy jetkizemiz, – deıdi qalalyq kásipkerler tobynyń múshesi Zarına Aıdarhanova.
Aıta ketý kerek, Shyǵys Qazaqstan oblysy bas dárigeriniń 11-shi qaýlysyna sáıkes, shekteý, onyń ishinde karantındik sharalar 13 maýsym kúni saǵat 00:00-ge deıin uzartyldy.
