Semeıde bir-birin 10 jyl kórmegen aǵasy men qaryndasy qaýyshty

SEMEI. QazAqparat – Semeı qalasynda túrme qyzmetkerleri sottalǵan azamattyń Germanııadaǵy ápkesin taýyp, 10 jyldan keıin qaıta qaýyshtyrdy, dep habarlaıdy QazAqparat tilshisi.

Oblystyq QAJD baspasóz qyzmetiniń málimetinshe, 37 jastaǵy azamat kisi óltirgeni úshin Semeıdegi №20 túzetý mekemesinde jazasyn ótep jatyr.

Ol 16 jylǵa jýyq ýaqytyn túrmede ótkizgen. Osy ýaqytqa deıin ózin bolashaqta ne kútip turǵanyn tipti elestken emes, sebebi onyń bir de bir týysy qalmaǵan.

Tek týǵan qaryndasy Natasha ǵana bar edi.

«Sottalǵan jigit qaryndasyn uzaq izdedi. Biraq esh nátıje bolmady. Óıtkeni onyń telefonyn da, mekenjaıyn da bilmeıtin. Sol kezde er adamǵa túrme qyzmetkerleri kómektesti. Natashany tegi men týǵan jyly arqyly izdep tapty. Osylaısha, baýyry men qaryndasy 10 jyldan keıin qaıta qaýyshty», - delingen aqparatta.

Kezinde ata-anasy qaıtys bolǵannan keıin ekeýi jetim qalypty. Tek bir-birine arqa súıep ǵumyr keshken. Taǵdyr olardy 2012 jyly ajyratty.

«2006 jyly er adam alǵash ret túrmege qamalǵan. 2012 jyly bostandyqqa shyǵyp, birden Germanııadaǵy baýyryna barady. Qaryndasynyń qasynda birneshe kún ǵana bolyp, ketip qaldy. Nebári 7 aı bostandyqta bolǵan ol qaıtadan qylmys jasap, temir torǵa qamalǵan. Osylaısha, baýyrlar bir-birin 10 jyl boıy tappaı kelgen», - delingen habarlamada.

Osy jyldar boıy Natasha baýyryn qaıta kóretinine senip kelipti. Onyń tiri ekenin estigende, esh oılanbastan Semeıge keldi.

Bir-birin kórgende ekeýi de kóz jasyna erik berdi. Endi ápkesi baýyry bostandyqqa shyqqannan keıin jańa ómir bastaýǵa kómektesip, barynsha qoldaý kórsetýdi oılap otyr.

«Bizdiń bir-birimizden basqa eshkimimiz joq. Sol úshin árdaıym birge bolýymyz kerek», - deıdi áıel.

Natasha áli de Germanııada turady. Kúıeýi, eki balasy bar.