Semeıde bir aptada 2 myńǵa jýyq jol erejesin buzý faktisi tirkeldi

SEMEI. QazAqparat – Semeı qalasynda bir aptada 2000-ǵa jýyq jol erejesin buzý faktisi tirkeldi, dep habarlaıdy QazAqparat tilshisi.

Qalalyq Polıtsııa basqarmasy baspasóz qyzmetiniń málimetine súıensek, tártip saqshylary «Qaýipsiz jol» jedel-aldyn alý sharasyn ótkizdi. Ondaǵy maqsat - jol-kólik oqıǵalaryn azaıtý, jol erejelerin buzýshylyqtyń aldyn alý.

Shara barysynda 2156 ereje buzý faktisi tirkeldi. Onyń ishinde eń kóbi - qaýipsizdik belbeýin taqpaý jáne kólik basqarý kezinde uıaly telefon paıdalaný.

«Mas kúıde rýlge otyrǵan 19, qarsy baǵytqa shyǵyp ketken 14, jaıaý júrginshilerge jol bermegen 257 jáne manevr jasaý erejelerin buzǵan 169 júrgizýshi ákimshilik jaýapkershilikke tartyldy. Sondaı-aq jaıaý júrginshiler tarapynan jol erejesin buzýdyń 408 faktisi anyqtaldy», - dedi qalalyq PB patrýldik polıtsııa batalony komandıriniń orynbasary Ádilbek Nyǵmanov.