Semeıde bilim salasyndaǵy jemqorlyqpen kúrestiń jańa ádisi usynyldy

ÓSKEMEN. QazAqparat – Semeı qalasynda bilim salasyndaǵy sybaılas jemqorlyqqa qarsy turýdyń jańa ádisi usynyldy, dep habarlaıdy QazAqparat.

Qalalyq ákimdikte mektep dırektorlary men esepshileriniń qatysýymen ótken jıynda oqý oryndaryndaǵy sybaılas jemqorlyqqa jáne aqsha jınaýǵa qarsy kúres máseleleri talqylandy.

Semeı qalalyq bilim bóliminiń basshysy Natalııa Fesenkonyń aıtýynsha, aldyn alý maqsatynda birqatar sharalar júrgizilip jatqanyna qaramastan, shahardaǵy bilim ordalarynda jemqorlyq faktileri áli de az emes.

Mysaly jýyqta bıýdjet qarajatyn jymqyrǵan № 27 jáne № 49 mekteptiń esepshileri sottalǵan bolatyn. Osyndaı qylmys faktilerin azaıtý maqsatynda ortalyqtandyrylǵan býhgalterııa qurý bastamasy kóterildi.

«Bul usynys uzaq ýaqyttan beri kún tártibinde tur. Alaıda oblystyq bilim basqarmasy qyrkúıekten bastap jeke qarjylandyrý engiziletindikten osy bastamanyń iske asyrylýy múmkin bolmaıdy deıdi. Dese de, biz ortalyqtandyrylǵan býhgalterııa qurylýy kerek dep esepteımiz. Sebebi negizinen bıýdjetten jáne demeýshilik shottardan aqsha urlaý jaǵdaılarynyń basty sebebi mektep dırektorlarynyń qarjylyq saýattylyq deńgeıiniń tómendigi men baqylaýdyń jetkiliksiz bolýynda. Qazirgi ýaqytta dırektorlarǵa qarjylyq saýattylyq jóninde kýrstar ótkizýdi qolǵa alyp jatyrmyz», - deıdi Natalııa Fesenko.

Búginde ár mektepte sybaılas jemqorlyqqa qarsy jumys júrgizilýde. «Adal urpaq» jáne «Adaldyq dúkeni» syndy klýbtar qurylǵan.

Degenmen áli kúnge deıin ata-analar muǵalimderdiń aqsha jınaıtynyn aıtyp shaǵymdanýda. Biraq ótken jylmen salystyrǵanda mundaı aryzdar birshama azaıǵan.