Semeıde baspana kezeginde turǵan 20 otbasyna páter kilti tabystaldy

SEMEI. QazAqparat – Táýelsizdiktiń 30 jyldyǵyna oraı Semeı qalasyndaǵy Ushaqtar kentinde 20 otbasyna páter kilti tabystaldy, dep habarlaıdy QazAqparat tilshisi.

Páter kiltin tapsyrý saltanatyna qala ákimi Baqytjan Baıahmetov qatysty.

«Birqabatty Shyǵys» baǵdarlamasy boıynsha halyqty turǵyn úımen qamtamasyz etý jumysy qarqyndy júrgizilip jatyr. Búgin biz jańa qonys ıelerine baspana kiltterin tapsyrdyq. Olardy osy qýanyshty kúnmen shyn júrekten quttyqtaımyn», - dedi Baqytjan Baıahmetov.

Mereke kúni 20 otbasy qonys toıyn toılady. Jalpy bıyl atalǵan baǵdarlama aıasynda 40 páter salynǵan.

Úıli bolǵandardyń biri – kópbalaly ana Úmit Qyrǵyzova. Ol birneshe jyl turǵyn úı kezeginde turǵan.

«Tórt balam bar. Búgin bizge kóp kútken jańa páterdiń kilti tabystaldy. Qýanyshymda shek joq», - dedi ol.

Aıta keteıik, búgingi tańda shahar boıynsha 12 200 adam turǵyn úı kezeginde tur.