Semeıde balasy mysyqty kirjýǵysh mashınaǵa salyp óltirgen áıel aıyppul tóleıdi
SEMEI. KAZINFORM – Semeı qalasynda bala mysyqty kirjýǵysh mashınaǵa salyp jibergen.
Semeılik áıel áleýmettik jelidegi paraqshasynda vıdeo jarııalap, onda ulynyń kir jýǵysh mashınaǵa mysyqty salyp jibergenin aıtqan. Sonyń saldarynan mysyq ólip qalǵan.
Osyǵan baılanysty polıtsııa qyzmetkerleri tekserý júrgizdi.
- Tekserý barysynda atalǵan oqıǵanyń abaısyzdan bolǵany anyqtaldy. Osy fakti boıynsha úı janýarynyń ıesi janýarlarǵa jaýapkershilikpen qaraý salasyndaǵy Qazaqstan Respýblıkasy zańnamasyn buzǵany úshin ákimshilik jaýapkershilikke tartyldy, - dep habarlady Abaı oblysynyń polıtsııa departamentinen.
Qoldanystaǵy zańnamaǵa sáıkes, oǵan 10 AEK (43 250 teńge) mólsherinde aıyppul salyndy.
Osy rette, polıtseıler janýarlarǵa jaýapkershilikpen qaraý talaptaryn saqtaý ár azamattyń mindeti ekenin eske saldy.
Eske salsaq, osyǵan deıin ýchaskelik polıtseılerge ıt pen mysyqtardyń chıptelýin tekserý ókilettigi beriletindigi habarlanǵan.
