Semeıde balalardy ońaltý ortalyǵy ashylmaq
SEMEI. QazAqparat – Semeı qalasynda balalardy ońaltý ortalyǵy ashylady, dep habarlaıdy QazAqparat tilshisi.
Tuńǵysh Prezıdenttiń «Qamqorlyq» qorynyń qoldaýymen ótken jyly elimizdiń túrli qalalarynda 9 ońaltý ortalyǵyn ashý josparlanǵan bolatyn. Olardyń biri Semeı shaharynda ashylady dep kútilýde.
«Merziminen erte týǵan shaqalaqtar kóp kútimdi qajet etedi. Mundaı nárestelerdi ońaltyp, olardyń ómir súrý sapasyn arttyrý – bizdiń basty maqsatymyz. Sábıler nevropotolog, lor, aftolmolog sııaqty dárigerlerdiń qatań baqylaýynda bolýy kerek. Sonda ǵana kez kelgen aýrýdyń aldyn alýǵa bolady», - deıdi náresteler potologııasy bóliminiń dárigeri Asııa Muhamedkárimqyzy.
Sońǵy ýaqytta Semeıde nárestelerdiń merziminen erte týýy kóbeıgen. Búgingi tańda potologııa bóliminde 45 náresteniń 30-y erte týǵandar. Osy rette, analar mundaı ortalyqtyń aýadaı qajet ekendikterin jetkizdi.
«Semeı qalasynda osyndaı ortalyq ashylady degendi estip qatty qýandyq. Merziminen erte týǵan sábılerge erekshe kóńil bólinýi tıis. Balalarymyz arnaıy mamandardyń baqylaýynda bolatyndyǵyna dán rızamyz», - deıdi qala turǵyny Aıda Baımoldına.
Aıta keteıik, ońaltý ortalyǵynda merziminen erte týǵan shaqalaqtan qandaı da bir aýytqýy bar 18 jasqa deıingi jasóspirimder baqylanatyn bolady.
