Semeıde balaǵat sóz aıtqan stendap-bloger qamaýǵa alyndy

SEMEI. KAZINFORM — Semeı qalasynda balaǵat sóz qoldanǵan stendap-bloger 5 táýlikke ákimshilik qamaýǵa alynǵany belgili boldy.

Oblystyq Polıtsııa departamenti baspasóz qyzmetiniń málimetine súıensek, qaladaǵy meıramhanalardyń birinde ótken stendap-shoý barysynda jergilikti bloger kópshilik aldynda beıádep sózder qoldanǵan. 

— Oqıǵaǵa qatysty beınejazba áleýmettik jelige taralyp, el arasynda qyzý talqyǵa tústi. Polıtsııa qyzmetkerleri vıdeomaterıaldy zerdelep, atalǵan azamatty qoǵamdyq orynda boqtyq sózder aıtqany úshin ákimshilik jaýapkershilikke tartty, — delingen aqparatta.

Sot blogerdi 5 táýlikke ákimshilik qamaqqa alý týraly sheshim shyǵardy.

Osy rette, tártip saqshylary kópshilik aldynda ótetin is-sharalar, onyń ishinde ázil-syqaq baǵdarlamalary da, qoǵamdyq ádep normalaryn saqtap, kórermenge qurmet kórsete otyryp júrgizilýi qajettigin eskertti. 

Eske salsaq, osyǵan deıin erekshe balalardyń ata-analaryn qorlaǵan bloger 78 640 teńge aıyppul tólegeni habarlanǵan.