Semeıde baǵdarshamnyń qyzyl túsine ótken júrgizýshi adam qaǵyp, ǵımaratqa soǵyldy

SEMEI. QazAqparat – Semeı qalasynda baǵdarshamnyń qyzyl túsine ótip ketken mas júrgizýshi 18 jastaǵy jigitti qaǵyp, bank ǵımaratyna soǵyldy, dep habarlaıdy QazAqparat tilshisi.

Abaı oblystyq Polıtsııa departamenti baspasóz qyzmetiniń málimetine súıensek, 25 jastaǵy semeılik «Toyota Crown» markaly avtokóligimen alkogoldi ishimdik ishken kúıde B. Momyshuly kóshesimen kele jatqan.

«Momyshuly-Ýálıhanov kósheleriniń qıylysynda baǵdarshamnyń qyzyl túsine ótip ketken ol, trotýarmen júrip bara jatqan 18 jastaǵy jaıaý júrginshini qaǵyp ketip, odan ári bank ǵımaratyna soǵylǵan. Jol apaty saldarynan túrli deńgeıdegi dene jaraqattaryn alǵan jábirlenýshi medıtsınalyq mekemege jetkizildi», - delingen aqparatta.

Tártip saqshylary júrgizýshini ustap, ýaqytsha ustaý ızolıatoryna qamady. Atalǵan fakti boıynsha QR QK-niń 345-baby 1-bóligine sáıkes sotqa deıingi tergeý amaldary bastaldy.