Semeıde ajyrasqandar sany artty
SEMEI. QazAqparat - Semeı qalasynda ótken jyly ajyrasqandar sany birshama ósti, dep habarlaıdy QazAqparat.
Semeı qalasyndaǵy aqparat ortalyǵynda ótken baspasóz máslıhaty barysynda sot ókilderi ótken jyldy qorytyndylady. Qalalyq sot tóraǵasy Nurjan Ábdikárimovtiń aıtýynsha, ótken jyly nekeni buzý týraly aryz jazǵandardyń sany 20%-ǵa artqan.
«Byltyr 2167 otbasy ajyrasýǵa bel baılasa, 2018 jyly bul kórsetkish 1744-di quraǵan. Osyǵan oraı biz AHAJ bóliminde bilikti psıhologtar men zańgerler jumys isteıtin jas otbasylardy qoldaý kabınetin ashtyq. Sondaı-aq byltyr ákimdikpen birlesip, Abaı kitaphanasynda tatýlasý ortalyǵy quryldy. Onda turǵyndar zańger, notarıýs jáne otbasylyq psıhologtyń keńesin ala alady» - deıdi ol.
Onyń aıtýynsha, ótken jyldyń jeltoqsan aıynan bastap oblystyq sottyń bastamasymen eńbek daýlarynyń aldyn alý maqsatynda pılottyq joba engizilgen.
«Semeı qalasyndaǵy birqatar kásiporyn jumysshylary áli kúnge deıin jalaqylaryn ala almaı otyr. Osyndaı isterdi notarıýs qaraıdy. Biraq eger notarıýs isten bas tartsa, onda ol sotqa jetkiziledi. Bul ister eńbek ınspektorynyń, kásipodaqtardyń jáne basqa da múddeli tulǵalardyń qatysýymen qaralady», - deıdi Nurjan Ábdikárimov.
