Semeıde áıelge psıhologııalyq qysym kórsetken stalker sottaldy

CEMEI. KAZINFORM — Semeıde stalkerge sot úkimi shyqty. Bul týraly Polisia.kz jazdy.

Semeı qalasynda sot birneshe aı boıy áıeldi onyń birneshe ret bas tartqanyna qaramastan ańdyǵan 31 jastaǵy er adamǵa qatysty qylmystyq isti qarady.

— Іs materıaldaryna sáıkes, aıyptalýshy tórt aı boıy jábirlenýshige júıeli túrde habarlamalar jazyp, qońyraý shalǵan, onyń úıi men jumys ornyna barǵan, sondaı-aq týystary arqyly yqpal etýge tyrysqan. Messendjerlerde buǵattalǵanyna jáne abonenttik nómirleri aýystyrylǵanyna qaramastan, er adam baılanys ornatýǵa tyrysýdy toqtatpaǵan, — delingen habarlamada.

Osylaısha jábirlenýshige psıhologııalyq qysym kórsetken. Qýdalaý faktileri tirkelgennen keıin qylmystyq is bir táýlik ishinde sotqa joldandy. Sot talqylaýy barysynda aıyptalýshynyń kinási dáleldendi.

Sot ony QR Qylmystyq kodeksiniń 115-1-baby boıynsha kináli dep tanyp, 100 saǵat qoǵamdyq jumysqa tartý jazasyn taǵaıyndady. Sonymen qatar, onyń minez-qulqyna 10 aı merzimge erekshe talaptar belgilendi.

Quqyq qorǵaý organdary maza bermeı qýdalaý men psıhologııalyq qysymnyń qylmystyq jaýapkershilikke ákelýi múmkin ekenin eske salady jáne azamattarǵa óz quqyqtaryn qorǵaý úshin ýaqytyly júginýge keńes beredi.

Buǵan deıin BQO-da stalkıng jasaǵan er adamǵa aıyppul salynǵan bolatyn.