Semeıde áıel men onyń eki balasyn qaǵyp ketken kólik júrgizýshisi izdestirilýde
SEMEI. QazAqparat – Semeı qalasynda áıel men onyń eki balasyn qaǵyp ketken kólik júrgizýshisi izdestirilýde, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, jol-kólik oqıǵasy 10 qarasha kúni saǵat 18.00 shamasynda bolǵan.
«Kólik tizgindep kele jatqan júrgizýshi Morozov-Shevchenko kósheleriniń qıylysynda kámeletke tolmaǵan eki balasymen joldan ótip kele jatqan áıeldi qaǵyp ketti. Sodan keıin ol toqtamastan sol jerden iz sýytqan», - dep habarlady vedomstvo ókilderi.
Áıel adam men onyń 2 jáne 3 jastaǵy balalaryna medıtsınalyq kómek kórsetildi. Qazirgi ýaqytta olardyń ómirlerine eshqandaı qaýip tónip turǵan joq.
Tártip saqshylary kólik júrgizýshisiniń kim ekendigin anyqtaý úshin jedel-izdestirý sharalaryn júrgizýde.
