Semeıde Aıaz atanyń qatysýymen baspasóz máslıhaty ótti
SEMEI. QazAqparat – Semeı qalasynda Aıaz atanyń qatysýymen baspasóz máslıhaty ótti, dep habarlaıdy QazAqparat tilshisi.
Aımaqtyq kommýnıkatsııalar qyzmetinde Abaı atyndaǵy teatrdyń jáne F.Dostoevskıı atyndaǵy «Darıǵa-aı» teatrynyń ókilderimen baspasóz máslıhaty ótti.
Akterler úshin osy jyldaǵy eń qýanyshty jańalyqtardyń biri - karantındik shekteýlerdiń jeńildeýi boldy. Endi teatr zaldarynyń 80%-y kórermenge tolady.
«Karantın kezinde kóptegen ınternet jobalardy qolǵa aldyq. Alaıda bul báribir teatrdaı bolmaıdy. Teatr degenimiz – akter pen kórermenniń qarym-qatynasy. Bizge kelgen ár adamdy kóremiz, estımiz, sezemiz. Spektakldiń ótýi kóp jaǵdaıda kórermenge baılanysty. 2021 jyly ujymymyz Kókshetaýda ótken halyqaralyq festıvalǵa qatysyp, Rachı Mahataevtyń «Erteń soǵys boldy» atty qoıylymymen bas júldeni jeńip aldy», - dedi F.M.Dostoevskıı atyndaǵy teatr akteri Andreı Glýshkov.
Kelesi jyly Abaı atyndaǵy teatrda zańǵar jazýshy Muhtar Áýezovtyń 125 jyldyǵy aıasynda «Qarakóz» spektakli sahnalanbaq.
Almatydan rejısser shaqyrtylady. Sondaı-aq Jańa jyl merekesinen keıin Qabanbaı batyrdyń 330 jyldyǵyna arnalǵan jańa qoıylymǵa qatysty jumystar bastalady.
Baspasóz máslıhatynda Aıaz ata bolyp kıingen F.M.Dostoevskıı atyndaǵy teatr akteri Fedor Lıýbetskıı semeılikterdi kele jatqan Jańa jyl merekesimen quttyqtady.
Ol 42 jyl boıy Jańa jyldyń bas keıipkeriniń rólin somdap keledi.
«Barshańyzǵa beıbit ómir, shynaıy mahabbat tileımin. Jańa 2022 jylda armandaryńyz oryndalsyn. Eń bastysy – densaýlyqtaryńyz myqty bolsyn. Aspanymyz árdaıym ashyq bolyp, elimiz órkendeı bersin!», - dep quttyqtady Fedor Lıýbetskıı.
