Semeıde avtojýý beketi órtenip, gazgolder jaryldy
ASTANA. KAZINFORM — Semeı qalasynyń Soltústik aýdanyndaǵy Sosnovaıa kóshesinde bir qabatty avtojýý ǵımaratynan órt shyqty, dep habarlaıdy TJM baspasóz qyzmeti.
Tótenshe jaǵdaılar mınıstrliginiń málimetinshe, órt sóndirý qyzmeti kelgenge deıin oqıǵa ornyndaǵy gazgolder jarylǵan. Órt júk kóligine jáne jaqyn mańdaǵy eki jeke turǵyn úıge taraǵan.
Qazirgi ýaqytta órttiń aýmaǵy anyqtalyp jatyr. Aldyn ala málimet boıynsha, zardap shekkender joq.
— Oqıǵa ornynda TJM kúshteri men quraldary joǵary rang boıynsha jumys istep jatyr. Órtti sóndirý úshin úzdiksiz sý berý uıymdastyrylyp, birneshe órt sóndirý oqpany iske qosylǵan. Jumysty úılestirý úshin oqıǵa ornynda órt sóndirý shtaby quryldy, — delingen habarlamada.
Qutqarýshylar órtti sóndirý jumystaryn jalǵastyryp jatyr.
Buǵan deıin Tarbaǵataıdaǵy órt toqtatylyp, oshaqtary sóndirilip jatqanyn jazǵanbyz.
