Semeıde avtoturaq salmaq bolǵan kásipker 17 aǵashty zańsyz kesken
SEMEI. QazAqparat – Semeı qalasynda avtoturaq salmaq bolǵan kásipker 17 aǵashty zańsyz kesken, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, 1 qyrkúıekte janarmaı quıý beketiniń janynda 51 jastaǵy er adam 17 terekti zańsyz kesken. Anyqtalǵandaı, kásipker qalalyq turǵyn úı-kommýnaldyq sharýashylyǵy bóliminen eshqandaı ruqsat almasa da, sol jerge avtoturaq salmaq boldy.
«Atalǵan azamat 2021 jyldyń 18 maýsymynda TÚKSh bólimine Boztaev kóshesindegi ǵımarat mańyndaǵy 17 aǵashty kesýge ruqsat berý týraly ótinish jazǵan. Alaıda 23 maýsymdaǵy jaýapta «E.license« portalynda kórsetilgen qajetti qujattar tizimi tolyqtaı usynylmaǵandyqtan oǵan ruqsat berilmedi», - delingen aqparatta.
Qazirgi ýaqytta er adamǵa qatysty QR Qylmystyq Kodeksiniń 340-baby boıynsha iz qozǵaldy. Tergeý amaldary jalǵasýda.
