Semeıde avtobýstar kúnine 3 ret dezınfektsııalanýda
SEMEI. QazAqparat – Semeı qalasynda qoǵamdyq kólikter kúnine 3 ret dezınfektsııalanýda, dep habarlaıdy QazAqparat.
Bul týraly koronovırýsqa qarsy qabyldanǵan sharalarǵa arnalǵan otyrys barysynda Semeı qalasynyń jolaýshylar kóligi jáne avtomobıl joldary bóliminiń basshysy Serikqalı Jumanov aıtty.
«6 naýryzdan avtobýs salondaryn tazartyp otyrý jumystaryn bastadyq. Barlyq qoǵamdyq kólikterdiń tizimi jasaldy. Búginde úsh tasymaldaýshy kompanııaǵa da hat jiberilgen. Olar dezınfektsııa jumystaryn ózderi júrgizýde. Jolaýshylardy tasymaldaý erejelerine sáıkes dezınfektsııa kúnine 3 ýaqyt, naqty aıtqanda tańerteń, tústen keıin jáne keshke qaraı garajǵa oralǵanda jasalady», - deıdi ol.
Osy maqsattaǵy jumystar aldaǵy ýaqytta áýejaıda jáne avtobeketterde de bastalmaq.
Sondaı-aq atalmysh otyrys barysynda azyq-túlik baǵasyn negizsiz ósirmeý máselesi qaraldy.
«Búginde maýsymǵa saı keıbir azyq-túliktiń baǵasy artqan. Biraq onyń koronavırýske esh qatysy joq. Atap aıtqanda, qaraqumyq jarmasy 1,8%, sábiz 3,5%, pııaz 4,8% jáne jumyrtqa 1% qymbattady. Basqa azyq-túlik taýarlarynyń baǵasy turaqty», - dedi kásipkerlik bóliminiń basshysy Danııar Shákárimov.
Onyń aıtýynsha, turaqtandyrý qorynda 850 tonnaǵa jýyq azyq-túlik bar. Alaıda qaladaǵy saýda oryndarynyń bári birdeı turaqtandyrý qorymen kelisimge kele bermeıdi. Qazirgi tańda tek 43 dúkenmen kelisimsharttar jasalǵan. Baǵaǵa monıtorıng jasaıtyn arnaıy top quryldy, onyń músheleri saýda oryndarymen jumys isteýde.
Jalpy shahar boıynsha kásipkerlermen baǵany turaqtandyrý týraly 280 memorandýmǵa qol qoıylǵan. Azyq-túlik qory jetkilikti.
Qala ákimi Ermak Sálimov baǵanyń qymbattaýyna jol bermeýdi tapsyrdy.
