Semeıde avtobýs júrgizýshisi jol boıynda turǵan adamdy qaǵyp óltirdi
SEMEI. QazAqparat – Semeı qalasynda avtobýs qaǵyp ketken 45 jastaǵy er adam kóz jumdy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, jol-kólik oqıǵasy 28 qazan kúni keshki ýaqytta bolǵan.
«Semeı-Talıtsa» tasjolynda kele jatqan «PAZ» markaly avtobýs júrgizýshisi jol boıynda turǵan 45 jastaǵy azamatty qaǵyp ketken. Er adam alǵan jaraqattarynan sol jerde mert boldy. Anyqtalǵandaı, marqum mas kúıde bolmaǵan.
«Qazirgi ýaqytta atalǵan fakti boıynsha QR Qylmystyq kodeksiniń 345-baby 3-bóligine (Kólik basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy saldarynan abaısyzda adam ólimine ákep soǵýy) sáıkes sotqa deıingi tergeý amaldary bastaldy. Tıisti sot-medıtsınalyq saraptamalar taǵaıyndalǵan», - dedi departament bastyǵy Saǵat Mádıev.
Esterińizge sala ketsek, osyǵan deıin «Omby-Maıqapshaǵaı» tasjolynda kólik aýdarylyp, 3 adam kóz jumǵany habarlanǵan.
