Semeıde avtobýs jolaqysy qymbattaı ma – ákimdik jaýaby
SEMEI. QazAqparat – Abaı oblysynyń ákimdigi Semeıde avtobýs jolaqysy qymbattaıtyndyǵyna qatysty taraǵan aqparat boıynsha rásmı málimdeme jasady, dep habarlaıdy QazAqparat tilshisi.
Sońǵy kúnderi BAQ-ta jáne áleýmettik jelide Semeıde qoǵamdyq kóliktegi jolaqysynyń qymbattaıtyny týraly aqparat taraǵan. Onda eger qazir avtobýspen qatynaý úshin qala turǵyndary 80 teńge tólese, jańa tarıfpen jol júrý quny 100 teńge bolatyny týraly jazylǵan.
Abaı oblysy ákiminiń orynbasary Dmıtrıı Garıkov qoǵamdyq kólikte jol júrý tarıfin kóterý máselesi resmı túrde qarastyrylmaǵanyn jáne qarastyrylmaıtynyn málimdedi.
«Jaqyn arada tarıf óspeıdi. Jalpy, avtobýs parkiniń jumysy turaqty baqylaýda. Jelide kondýktorlar, júrgizýshiler men kólik jetispeýshiligi máselesi bar. Búgingi kúni keste 100% oryndalmaýda. Bul máseleni birneshe ret qarastyrdyq. Eger kondýktorlardyń tapshylyǵyn valıdatorlardy ornatý arqyly sheshetin bolsaq, onda júrgizýshilerdi tek jalaqyny kóterý arqyly jumysqa tartýǵa bolady», - dedi ol.
Oblys ákimi orynbasarynyń aıtýynsha, Semeıdegi avtobýs júrgizýshileri bekitilgen normadan artyq jumys isteýde. Olar bir aýysymda 8 saǵattyń ornyna 10-12 saǵat eńbek etedi. Al qosymsha tólemderdi eskergende jalaqylary aıyna 250 myń teńgeden aspaıdy.
«Basqa qalalarmen salystyryp kóreıik. Máselen, elordada júrgizýshiler qalypty rejımde jumys istese de, 400 myń teńgeden joǵary aılyq alady. Bul máseleni sheshý úshin biz arnaıy jol kartasyn jasap, júrgizýshilerdiń jalaqysyn kóterý mehanızmin ázirledik. Biraq bul tarıfti kóterý arqyly emes, memlekettik sýbsıdııa esebinen júrgiziletin bolady», - dedi Dmıtrıı Garıkov.
