Semeıde avtobýs jol apatyna túsip, jolaýshylar zardap shekti
SEMEI. KAZINFORM – Semeı qalasynda avtobýs pen jeńil kólik soqtyǵysty.
Abaı oblystyq polıtsııa departamenti baspasóz qyzmetiniń málimetine súıensek, jol-kólik oqıǵasy 16 qyrkúıekte saǵat 13:10 shamasynda boldy. Qarjaýbaıuly men Energetık kósheleriniń qıylysynda avtobýs pen JETOUR X70 avtokóligi soqtyǵysty.
- Aldyn ala málimet boıynsha, avtobýstyń 50 jastaǵy júrgizýshisi solǵa burylý kezinde rýldi basqara almaı qalyp, jolda turǵan avtokólikke soǵylǵan. Jol apaty saldarynan zardap shekkender bar. Olarǵa qajetti medıtsınalyq kómek kórsetilip jatyr, - delingen aqparatta.
Oqıǵa ornynda polıtsııa qyzmetkerleri men jedel qyzmet ókilderi jumys istep jatyr. Jol qozǵalysynyń qaýipsizdigi qamtamasyz etilýde.
- Jol-kólik oqıǵasy boıynsha tekserý júrgizilip, bolǵan jaǵdaıdyń barlyq mán-jaıy anyqtalýda. Tekserý nátıjesi boıynsha túpkilikti protsessýaldyq sheshim qabyldanady, - delingen habarlamada.
Eske salsaq, osyǵan deıin Qaraǵandy mańynda jolaýshylary bar avtobýs «Gazelmen» soqtyǵysqany habarlanǵan.
