Semeıde aýyl sharýashylyǵyn qoldaýǵa 1,5 mlrd teńge bólingen
SEMEI. QazAqparat – Semeı qalasynda aýyl sharýashylyǵyn qoldaýǵa 1,5 mlrd teńge bólingen, dep habarlaıdy QazAqparat tilshisi.
Bul týraly baspasóz konferentsııa barysynda qalalyq aýyl sharýashylyǵy bóliminiń basshysy Nurlan Shaqabaev málimdedi.
«Jyl basynan beri jalpy aýyl sharýashylyq óniminiń kólemi 17,5 mlrd teńgeni qurady. Quny 7,66 mlrd teńgeni quraıtyn 2 ınvestıtsııalyq joba iske asyryldy. Atap aıtqanda, sýarý júıeleriniń jáne ósimdik maılaryn óndiretin maı zaýytynyń qurylysy iske asyryldy. Bıyl Semeı boıynsha aýyl sharýashylyǵy daqyldarynyń egistik alqaby 15720 gektardy qurady. Búgingi tańda dándi daqyldar men baqsha daqyldary tolyq jınaldy. Jalpy 3000 gektardan astam kartop, 1500 gektardan astam kókónis jınalǵan», - dedi ol.
Nurlan Shaqabaevtyń aıtýynsha, Semeıdi damytýdyń 2021-2022 jyldarǵa arnalǵan keshendi josparyn júzege asyrý sheńberinde Alǵabas aýyldyq okrýginde 1000 basqa arnalǵan bordaqylaý alańynyń qurylysy josparlanyp otyr.
«Sonymen qatar turǵyndardan sút jınaý jumystary jalǵasýda. Bıyl halyqtan 1210,9 tonna sút satyp alynǵan. Búginde sút óńdeıtin kásiporyndardyń júktemesi 60%-dy quraıdy», - deıdi bólim basshysy.
