Semeıde Aýstralııa ýnıversıtetiniń fılıaly ashylýy múmkin
ASTANA. KAZINFORM – Qazaqstan Respýblıkasynyń Ǵylym jáne joǵary bilim mınıstri Saıasat Nurbek Aýstralııanyń Merdok ýnıversıtetiniń ókilderimen kezdesti, dep habarlaıdy QR Ǵylym jáne joǵary bilim mınıstrliginiń baspasóz qyzmeti.
Taraptar Shákárim ýnıversıteti men Merdok ýnıversıteti arasyndaǵy strategııalyq áriptestikti damytý jáne Semeı qalasynda Aýstralııa ýnıversıtetiniń fılıalyn ashý perspektıvalaryn talqylady.
Kezdesýge Shákárim ýnıversıtetiniń Basqarma tóraǵasy – rektory Dýman Orynbekov, Basqarma múshesi – ınternatsıonaldandyrý jáne ınnovatsııalar jónindegi prorektory Erasyl Dýlatbaı, Merdok ýnıversıtetiniń Jahandyq baılanystar jónindegi prorektordyń orynbasary Saımon Djon MakKırdı, Tamaq ónerkásibin damytý perspektıvalary ınstıtýtynyń prorektory Pıter Mostın Devıs, sondaı-aq Merdok ýnıversıtetiniń Dýbaı kampýsynyń atqarýshy dırektory jáne strategııalyq seriktestik jónindegi dırektory Mohamed Abdýlhalek Mohamed Ba qatysty.
Kezdesý aıasynda Shákárim ýnıversıteti men Merdok ýnıversıteti ózara túsinistik týraly memorandýmǵa qol qoıdy.
Qujat akademııalyq jáne ǵylymı yntymaqtastyqty damytýǵa, birlesken bilim berý jáne zertteý bastamalaryn iske asyrýǵa, stýdentter men professor-oqytýshylar quramynyń akademııalyq utqyrlyǵyn keńeıtýge, birlesken bilim berý baǵdarlamalaryn ázirleýge, sondaı-aq sarapshylar men zertteýshiler almasýǵa baǵyttalǵan.
Kelissózderdiń negizgi taqyryptarynyń biri – Shákárim ýnıversıtetiniń bazasynda Merdok ýnıversıtetiniń fılıalyn ashý múmkindigi boldy.
Taraptar fılıaldy qurý men onyń jumys isteý modelin, kadr daıarlaýdyń perspektıvaly baǵyttaryn, sondaı-aq bastamany iske asyrýǵa qatysty akademııalyq, uıymdastyrýshylyq jáne ınfraqurylymdyq máselelerdi talqylady.
Abaı oblysynyń áleýmettik-ekonomıkalyq damýy úshin mańyzdy baǵyttarǵa erekshe nazar aýdaryldy. Olardyń qatarynda joǵary bilikti kadrlar daıarlaý, ǵylymı-zertteý áleýetin arttyrý jáne bilim berý úderisine halyqaralyq tájirıbeni engizý bar.
Merdok ýnıversıtetiniń fılıalyn ashý Qazaqstan men Aýstralııa arasyndaǵy joǵary bilim jáne ǵylym salasyndaǵy yntymaqtastyqty nyǵaıtýǵa, ozyq bilim berý jáne ǵylymı tájirıbeler transferine, adamı kapıtaldy damytýǵa jáne óńirdegi halyqaralyq bilim berý múmkindikterin keńeıtýge baǵyttalǵan perspektıvaly bastama retinde qarastyrylýda.
-Kezdesý qorytyndysy boıynsha taraptar birlesken bilim berý jáne ǵylymı-zertteý jobalaryn damytý, sondaı-aq Semeı qalasynda Merdok ýnıversıtetiniń fılıalyn ashý máselesin odan ári pysyqtaý jónindegi jumysty jalǵastyrýǵa ýaǵdalasty,-delingen habarlamada.
Osyǵan deıin qazaqstandyq JOO tsıfrlyq bilim berý boıynsha álemdik úzdik úlgiler qatarynda ataldy.
