Semeıde ataýly áleýmettik kómekke qujattar qabyldana bastady

NUR-SULTAN. QazAqparat - 5 qańtardan bastap halyqty jumyspen qamtý ortalyǵynda ataýly áleýmettik kómekke azamattardyń ótinishterin qabyldaý bastaldy, dep habarlaıdy Semeı qalasynyń aqparattyq ortalyǵy.

AÁK halyq aǵymyn retteý maqsatynda alfavıttik tártippen júzege asyrylady. Halyqty jumyspen qamtý ortalyǵynda 100 oryndyq kútý zaly uıymdastyrylǵan. Qabyldaý 102, 104, 105, 106 kabınetterde jáne akt zalynda júrgiziledi.

Aýyl turǵyndaryn ázirlengen grafıkke sáıkes aýyldyq okrýg ákimderi qabyldaıdy.

«Ataýly áleýmettik kómekke taǵaıyndalýy úshin eń basty krıterıı – adamnyń jalaqysy 21 300 teńgeden aspaý kerek. Eger azamat osy somadan az alsa, ol osy kómek alýǵa quqyly», – deıdi Semeı qalasynyń jumyspen qamtý jáne áleýmettik baǵdarlamalar bóliminiń basshysy Mýrat Kýrjıkaev.

Barlyq mamandar «E-Halyk» aqparattyq júıesimen jumys isteıdi.

Foıede aqparattyq stend pen teledıdar qoıylǵan, onda barlyq qajetti qujattar, ótinimderdiń nysandary men kerekti qujattar týraly aqparat ornalastyrylǵan.

Qala ákimi bekitken is-sharalar josparyna sáıkes, «Azamattarǵa arnalǵan úkimet» memlekettik korporatsııasynyń ókilderi, medıtsına qyzmetkerleri, patrýldik polıtsııa jáne órt sóndirý qyzmeti tartyldy.

Birinshi kúnde 295 otbasy qabyldandy, onyn ishinde 69 kópbalaly januıa. Ataýly áleýmettik kómekti taǵaıyndaý úshin 27 ótinish qabyldanyp, ýchaskelik komıssııaǵa berildi.