Semeıde áskerı qyzmetker otqa oranǵan úıden bala men ájeni alyp shyqty

Semeı qalasynda áskerı qyzmetker órtengen úıden bala men ájeni aman alyp shyqty, dep habarlaıdy Kazinform.

Abaı óńirlik garnızony baspasóz qyzmetiniń málimetine súıensek, oqıǵa 11 qarasha kúni saǵat 00:30 shamasynda bolǵan. Gertsen kóshesi, 67 mekenjaıynda ornalasqan ekiqabatty aǵash úı órtengen.  

«Bul kezde áskerı qyzmetker Samat Mákenov jubaıymen osy aýdanda ornalasqan kınoteatrdan qaıtyp kele jatqan. Otqa oranǵan úıdi baıqaǵan olar birden sonda umtylyp, úıde turatyn adamdardy oıata bastady», - delingen aqparatta. 

Áskerı qyzmetker áıeline jedel járdem men órt sóndirýshilerdi shaqyrýdy tapsyryp, ózi órtengen úıde qalǵan turǵyndarǵa kómekke júgirgen. Samat órt sóndirýshilerdi kútpeı-aq barlyq turǵynnyń esigin qaǵa bastady. 

«Jalyn men tútin Samattyń dálizde erkin júrýine múmkindik bermedi. Ol syrtqa shyǵyp, páteri qyzyl jalynnyń qaq ortasynda turǵan ájeni terezeden shyǵara bastady. Osy kezde oqıǵa ornyna birneshe adam jınaldy. Keıinnen basqa páterdiń terezesinen jylap jatqan balanyń daýysyn estigen áskerı qyzmetker ekinshi qabatqa kóterilmek bolǵanda qolyn jaraqattap alǵan. Soǵan qaramastan ol kishkentaı bala men onyń ata-anasyn órtten qutqaryp qaldy. Kóp uzamaı órt sóndirýshiler tilsiz jaýdy tolyqtaı aýyzdyqtady», - delingen habarlamada.

Samat ózin erlik jasadym dep sanamaıtynyn aıtty. Alaıda onyń der kezindegi áreketiniń arqasynda adam shyǵyny bolmady. 

«Samat Mákenov Abaı oblysy Kókpekti aýdany Lýgovoe aýylynda týyp-ósken. Pedagogıkalyq ýnıversıtetti «Dene shynyqtyrý jáne sport» mamandyǵy boıynsha bitirip, jattyqtyrýshy bolyp jumys istep, keıin áskerı boryshyn óteýge attandy. Taekvondodan birneshe dúrkin álem jáne Qazaqstan Respýblıkasynyń chempıony. Qazir Samat aǵa leıtenant shenimen Óskemen garnızonynyń áskerı bólimderiniń birinde qyzmet etedi. Úılengen, Álı esimdi uly jáne Aılın atty qyzy bar», - delingen Abaı óńirlik garnızony baspasóz qyzmetiniń dereginde.