Semeıde áskerge shaqyrylǵandardy medıtsınalyq tekserýden ótkizýge 40 mln teńge artyq tólengen — prokýratýra
SEMEI. KAZINFORM — Abaı oblysynda áskerı prokýratýra áskerge shaqyrylǵandardy medıtsınalyq tekserýden ótkizýge 40 mln teńge artyq tólengenin anyqtady. Áskerı prokýratýra emhanaǵa qatysty tekseris júrgizdi. Sonyń barysynda is júzinde tekserilgen áskerge shaqyrylýshylar sany kelisimshartta kórsetilgen mólsherden az ekeni anyqtalǵan.
Alaıda emhana ózine taǵylǵan aıyppen kelispedi. Іs Abaı oblysynyń mamandandyrylǵan aýdanaralyq ekonomıkalyq sotynda qaraldy.
Belgili bolǵandaı, mobılızatsııalyq daıyndyq jáne mobılızatsııany qamtamasyz etý qyzmeti men emhana arasynda 2023 jáne 2024 jyldary áskerge shaqyrylýshylardy medıtsınalyq qarap-tekserý boıynsha jalpy quny 99 mln teńgeden asatyn memlekettik satyp alý sharttary jasalǵan.
— Medıtsınalyq mekeme ókilderi sharttaǵy sandyq kórsetkishter qate engizilgenin, 4300 jáne 2200 adamdy tekserý kólemi — múlde oryndalmaıtyn mámile bolǵanyn jetkizdi. Alaıda bul kórsetkishterdiń tehnıkalyq erekshelikterge ádeıi oryndalmaıtyndaı etip engizilgenin dáleldeıtin ýájder usynylmady. Sondyqtan sot artyq tólengen 40 mln teńge memlekettik kiriske qaıtarylýy tıis degen sheshim qabyldady, — dep habarlady sottyń baspasóz qyzmetinen.
Eske salsaq, osyǵan deıin psıhologter áskerge daıyn emes 700-den asa adamdy anyqtaǵany habarlanǵan.