Semeıde «Ásker barysy - 2019» saıysynyń jeńimpazy anyqtaldy
SEMEI. QazAqparat - Semeı garnızonynda áleýetti vedomstvolardyń áskerı qyzmetshileri arasynda «Ásker barysy» ataǵyna qazaq kúresinen irikteý týrnıri óz máresine jetti, dep habarlaıdy QazAqparat QR Qorǵanys mınıstrligi saıtyna silteme jasap.
Saıysty «Shyǵys» óńirlik qolbasshylyǵy men Armııa ortalyq sport klýby (AOSK) uıymdastyrdy. Qazaqstan Respýblıkasynyń barlyq áleýetti qurylymdarynyń 30-dan asa myqty palýany «Ásker barysy» ataǵy jáne Elbasy júldesine qazaq kúresinen «Qazaqstan barysy» ІX respýblıkalyq týrnırine qatysýǵa joldama alý úshin tartysqa tústi.
«Jyl saıyn Qarýly kúshterde ótkiziletin chempıonattar qarqyndy damyp kelet jatyr. Saıysqa qatysýshylardyń sany ǵana emes, sportshy áskerı qyzmetshilerdiń sheberlik deńgeıi de artyp kele jatyr. Qazaqstan Qarýly kúshteriniń 8 garnızonynda sport keshenderi jumys isteıdi. Onda áskerı qyzmetshilerdiń balalary AOSK nusqaýshylarynyń jetekshilik etýimen sporttyń áskerı-qoldanbaly túrlerimen aınalysa alady», - dedi AOSK-nyń tóraǵasy Aıtalap Qorǵambaev.
Saıys qorytyndysy boıynsha AOSK-nyń sportshysy kishi serjant Talǵat Ámrenov jeńimpaz atandy, Memlekettik kúzet qyzmetiniń áskerı qyzmetshisi leıtenant Álibek Zekenov ekinshi oryndy ıelendi.
Kóshbasshylar úshtigine AOSK-nyń merzimdi áskerı qyzmetshisi qatardaǵy jaýynger Ádil Orazbaev ilikti.
«Jeńis ońaılyqpen kelgen joq. Sebebi, barlyq qarsylastar joǵary daıyndyq deńgeıleri men kásipqoılyqtaryn kórsetti. Biraq, alda talaı jumys bar. Maǵan «Qazaqstan barysy» respýblıkalyq týrnırine daıyndalýǵa týra keledi. Bul dúbirli dodada men elimizdiń Qarýly Kúshteriniń namysyn maqtanyshpen qorǵaıtyn bolamyn», - dedi saıys jeńimpazy kishi serjant Talǵat Ámrenov.
Ótken jyly AOSK-nyń merzimdi qyzmettegi áskerı qyzmetshisi Erasyl Qajybaev «Ásker barysy» týrnıriniń jeńimpazy atanǵanyn, ol «Qazaqstan barysy - 2018» dodasynyń kúmis belbeý ıegeri atanǵanyn esterińizge sala keteıik.
